Ny Molde FK-trenar Per-Mathias Høgmo på plass på Aker Stadion med nysigneringa Daniel Daga – NRK Møre og Romsdal – Lokale nyheter, TV og radio

Molde-laget er nå tilbake i rosenes by for å trene nokre dagar på heimebane, før turen på onsdag går til Marbella for ei ny treningssamling.

Under treningane på Aker Stadion er det i stor grad førstelagstrenar Paco Johansen som styrer øktene saman med Trond Strande, medan Per-Mathias Høgmo har ei meir observerande rolle.

Høgmo kom til klubben rett før laget reiste på sin første treningsleir til Benidorm. Han seier det var tolv fine dagar i den spanske kystbyen, og at det har vore veldig fint å bli kjent med klubben, leiarane og spelarane.

Høgmo liker godt det han har sett så langt, med mykje trøkk på treningane.

Han er sikker på at varemerket til Molde, offensiv god fotball, skal bli vidareutvikla, og dessutan at det blir viktig å jobbe med samhandling framover.

Snart klart for spel i Europa

Torsdag 13. februar kjem Høgmo sin første ordentlege test. Da er det klart for den første av to kampar mot irske Shamrock Rovers, der vinnaren får ein plass i 8.-delsfinalen i serieligaen.

Den ferske Molde-trenaren sin ser fram til dei kampane, og seier det alltid er gøy å konkurrere.

Kampane kjem samtidig som Molde er i gang med oppkøyringa til den norske Eliteserien, men Høgmo seier dei skal vere godt førebudde til kampane, og at dei legg eit fysisk grunnlag på treningane nå til dei to oppgjera.

Oppgjer som Høgmo er klar på at dei skal satse maksimalt for å få mest mogleg ut av.

Den første nysigneringa i sesongen

På plass på treningsfeltet er også Molde si nysignering Daniel Demenenge Daga, etter overgangen frå nigerianske FC One Rocket. 18-åringen, som blir rekna som eitt av Nigerias største fotballtalent, har vore ein spelar Molde har jobba lenge for å sikre seg.

På Molde FK sine nettsider blir Daga skildra som hardtarbeidande og teknisk sterk. Klubben framhevar hans evne til å lese spelet, bryte opp angrepet til motstandarane og levere presise pasningar.

– Det er fint å vere her. Det er ein fin liten by med hyggelege folk. Eg er veldig glad for å vere her, seier Daga til NRK.

Likevel innrømmer han at januar-temperaturen i Molde var eit lite sjokk for ein frosen kropp.

Daga har spelt ei rekke kampar for Nigerias U20-landslag, og fekk førre sesong prøve seg i den nigerianske toppdivisjonen, på utlån i klubben Enyimba FC.

Nå ser han på tida i Molde som eit potensielt steg mot store mål for framtida.

– Molde har eit godt lag, og så er det mange som har tatt steget frå denne klubben vidare ut i Europa. Eg ønsker å spele på høgst mogleg nivå i framtida. Målet er å vinne troféar, og eg ønsker å spele både i Meisterligaen og i fotball-VM, seier den ambisiøse midtbanespelaren.

Han avslører samtidig at engelske Chelsea er ein klubb han svært gjerne kan tenke seg å spele for ein gong i framtida.

– Spennande kjenning

Daga fortel at han trivst best i ei sentral midtbanerolle, og kallar seg taklingssterk. Han meiner sjølv han også er god éin mot éin, og vanskeleg for motstandarar å få tak på. Det vil nok truleg dei nye lagkameratane hans fort få merke på treningsfeltet.

– Det er godt å komme i gang med treningane og få vere saman med dei andre. Eg kan nesten ikkje vente med å komme i gang med å spele her, framfor Molde sine tilhengarar, seier Daga.

Også trenaren sjølv er spent på korleis nigerianaren kjem til å gjere det på bana.

– Han blei signert her før eg kom, og eg har høyrt mykje om han. Det har vore OK å sjå han her dei første dagane. Så det blir ein spennande kjenning. Ein ung spelar som sjølvsagt må tilpasse seg både kulturen og måten vi speler fotball på, seier Per-Mathias Høgmo.