– Elles er vi eit parti utan ryggrad – NRK Vestland

Sentralstyremøte i Senterpartiet møtest først på måndag, men alt nå seier fleire representantar for grasrota i partiet at nok er nok.

– Eg meiner at Senterpartiet må gå ut av regjering, seier Svein Pettersen (Sp), som er ordførar i Leka.

Alternativet er at partiet verkar «utan ryggrad», forklarer han:

– Elles går vi på akkord med våre verdiar og grunnprinsipp. Da er vi eit parti utan ryggrad.

NRK har dei siste dagane tatt tempen hos bakkemannskapet i Senterpartiet.

Fleire av representantane er klar på at «Sp-exit» er den einaste logiske utgangen på situasjonen som har oppstått. Blant desse Rennebu-ordførar Per Arne Lium (Sp):

– Dersom desse direktiva blir vedtatte, så må Sp forlate regjeringa, seier han.

Geir Iversen, som representerer Finnmark på Stortinget, er like kategorisk: Arbeidarpartiet har valt EU-vennskapen over kameratskapen med Senterpartiet, og da må Vedum ta konsekvensen av det.

– Skal ikkje møte byråkratane i Brussel med lua i handa

Andre uttaler seg mindre kategorisk:

– Eg meiner Senterpartiet bør stå opp for det vi meiner, svarer Overhalla-ordførar Hege K. Saugen (Sp), utan å konkretisere kva det inneber.

På spørsmål om framtida i regjering, svarer leiar i Senterungdommen Nils Forren at det må partiet «ta dag for dag». Han presiserer:

– Noreg er ein viktig kraftleverandør til Europa og skal ikkje møte byråkratane i Brussel med lua i handa. Vi må sette norske interesser først, og ikkje å gi vekk meir suverenitet.

Neste møte i EU-kommisjonen er 7. februar, men ingenting tilseier at Noreg er klar til å innlemme nye direktiv i EØS-avtalen innan det.

Til gjengjeld har Brussel sagt at dei føreset at Noreg ryddar opp i etterslepet og godkjenner direktiva innan neste møte i EØS-rådet (21. mai).

– Ei «snikinnføring» av heile pakken på sikt

Torsdag kveld hasteinnkalla Ap-leiar og statsminister Jonas Gahr Støre til møte med fleire hundre folke- og tillitsvalde der han åtvara mot å legge seg ut med EU.

Under møtet i Ap var det tilslutning til at dei tre direktiva kan gjennomførast, men Støre fekk spørsmål om kvifor direktiva måtte innførast no.

Det blei også stilt spørsmål om det er verdt å risikere regjeringskrise for å ta inn direktiva før stortingsvalet til hausten.

Same kveld (torsdag) sa Sp-topp Marit Arnstad i Debatten at ho fryktar at eit ja til EU-direktiva betyr ei «snikinnføring» av heile energimarknadspakken på sikt.

– Akkurat nå har eg ingen annan kommentar enn at nasjonal kontroll på straummarknaden er ei viktig sak for Senterpartiet, seier Ole Herman Sveian (Sp), som er fylkesleiar i Trøndelag.

Han viser til at «stabile og føreseielege låge straumprisar er viktige for folk i heile Noreg».

– Eg sit ikkje så tett på prosessane at eg har oversikt over utviklinga i regjeringa, men har full tillit til at folka våre i regjering og på Stortinget handterer denne saka på ein god måte for partiet.