Julevsámegiellaj gávnnu muhtema dajs ienemus dåbdos girjijs væráldin. Dassta de vierttip 22-jagágis Are Tjihkkomis gijttet, guhti girjijt julevsábmáj jårggål.
– Jáhkedahtte dát álgij gå åhtsåliv sámegiellaj låhkåt, javllá Tjihkkom NRK:aj. Gå sån lij nuorap de dåssju gallegasj girje gávnnujin nuorajda julevsámegiellaj. 18-jagágin sidáj juojddá dajna dahkat.
Dálla vuorddá desik suv gávtsát girjje almoduvvá – «The Hobbit», sámegiellaj «Hobihtta».
Vuona mánájgirjjeinstituhta direkterra Nisrin Maktabi-Barkouki javllá mánájgirje ietjat giellaj la ájnas sihke giellaåvddånahttemij, identitiehttaj ja vaj dåbdå kultuvrraj gulá.
Aj Lars Magne Andreassena mielas la dárbbo jårggålit giellaåvddånahttemij diehti. – Sávav ienep væráltgirjálasjvuoda klassihkkárijt jårggåluvvá.
