Mange elevar vel idrettsfag ved Gausdal vgs. for å trene mot Forsvaret – NRK Innlandet – Lokale nyheter, TV og radio

Ved idrettslinja på Gausdal vidaregåande skule skal nokre av elevane på sesjon.

Andre har alt vore der, og er klare for førstegongstenesta.

Felles for dei fleste er at dei har bestemt seg tidleg: Dei vil i Forsvaret.

Desse unge er godt nytt for Noreg.

For berre til neste år skal Forsvaret ta inn 400 fleire rekruttar enn i dag.

Og i løpet av dei neste ti åra skal dei ta inn 4600 fleire til fyrstegongsteneste.

Nestleiar i Nasjonal foreining for idrettsfag i vgs., Ellen Heggheim, seier dei merker at mange elevar i idrettsfag vil i militæret.

Veit kva dei vil

Faget breiddeidrett har vorte veldig populært ved idrettslinja på Gausdal vidaregåande.

Frå at 15 elevar valde det for fem år sidan, er dei nå 54 i dag.

Og det er inga tvil om at elevane på Idrettsfag ved Gausdal vidaregåande skule er motiverte for å kome inn i Forsvaret.

Målmedviten

Kristine Ressem Hansen og Mari Skøyen Stiansen gjev alt.

Her handlar det om å presse seg sjølv. Oppgåvene blir delt ut på førehand, så jobbar to og to fritt saman for å gjennomføre.

– Eg elskar å ta meg ut, seier Hansen.

Ho er ei av mange i salen som veit akkurat kva ho ønskjer når ho er ferdig med vidaregåande: Førstegongsteneste i Forsvaret.

Ho har vore på sesjon og til hausten skal ho tenestegjere i Sør-Varanger.

Ho er ikkje i tvil om at valet av idrettsfag gjer henne meir kvalifisert.

– Her har vi to lange fjellturar. Den eine er om vinteren. Og i fjor haust gjekk vi i Jotunheimen med sekk. Vi låg i telt og vi gjekk på toppar. Eg trur det er ei god førebuing til eit år i Forsvaret.

Ein treningsvillig gjeng

Lærar Stein Vidar Håveødegård er ikkje overraska over at fleire av elevane vil gjennom nålauget til Forsvaret.

– Dette er ein gjeng som liker å trene og ta utfordringar, både fysisk og mentalt.

– Dei blir nesten sure om vi har litt slappe økter.

– Jobbar de med trening som gjer at elevane klarer opptakskrava til Forsvaret?

– Vi jobbar mot ein kropp som skal vere godt trent og funksjonell i kvardagen. Det passar med kva Forsvaret treng. Og vi har militærøkter der vi ser på testar.

– Merkar utviklinga

At fleire på idrettsfag vil i militæret, seier nestleiar Ellen Heggheim i Nasjonal foreining for idrettsfag i vgs. er ein naturleg utvikling no som også jenter har verneplikt.

– Me merker at fleire jenter ønsker å dra i militæret.

– Me veit ikkje noko om ein tiendeklassing vel idrettsfag fordi dei skal i militæret. Men det er fleire elevar på denne linja som vil i militæret, ja.

Ho meiner linja gir elevane eit godt grunnlag for å klare seg i militæret.

– Me trur det er fleire elevar på idrettsfag som blir ekstra motiverte av å trene for eit mål. Og for nokon er målet å komma inn i militæret, seier ho, og legg til at faget gir elevane både kunnskap og erfaring dei vil få bruk for i militæret.

Godt førebudd

Troppssersjant Tom Marius Jenssen på rekruttskulen på Terningmoen i Elverum meiner den generelle grunnforma er betre no enn for 10–15 år sidan.

God form gir betre føresetnader for å lukkast.

– Er du i god form, er du også mentalt meir påskrudd, meiner eg.

Han fortel om lange dagar frå 06.00 og heilt til 20–21 og ein kvardag som skil seg frå det sivile.

– Det er lange treningsøkter. Mange er vant til den eine timen i treningsstudio, eller den halvtimen springing. Her skal vi kanskje marsjere i fire-fem timar med 27 kilo på ryggen.

– Så lange fjellturar med ryggsekk er bra trening?

– Legg inn litt kart og kompass der òg, så er du godt skodd!