Sámediggi namuhuvvo go ráđđehus dutká eiseválddiid giddema Ruoŧas.
Dát dieđiha SVT Sápmi.
Sámediggi Ruoŧŧa bealde lea oassin guorahallamis, masa gullet eiseválddit main leat unnit go čuođi bargi, ja gos ráđđehusa dutkit galget árvvoštallat galgá go eiseváldi heaittihuvvot vai ii.
Iskkadeapmi galgá guorahallat unnit etáhtaid doaimma ja barggu, vai oaidná berre go stáhta baicca ollásit váldit badjelasas daid smávit doaimmahagaid doaimmaid, dahje časkit muhtin eiseválddit časkit oktii.
Ságadoalli Håkan Jonsson ii leat fuolas, muhto hirpmahuvvan.
– Dušše dat ahte leat mielde dán dutkamis, lea viehka imaš munnje, dadjá son SVT Sápmái.
– Mii leat boazoealáhusa ja sámi kultuvrra eiseváldi ja mus lea váttis oaidnit mo eará láhkái galgá barggat. Dat livččii sámi iešmearrideami vuostá ja dan vuostá mo álgoálbmotáššit meannuduvvojit riikkaidgaskasaččat, lasiha son.
Iskkadeapmi, mii lea bistán čakčamánu rájes 2023:s, guoská buot almmolaš etáhtaide main leat gitta 100 bargi rádjai.
Sámi Radio ja SVT lea leamaš oktavuohta ovddasvástideaddji dutkiin, gii ii háliit searvat jearahallamii. Barggu birra galgá raporterejuvvot ráđđehussii guovvamánu álggus dán jagi.
