Suoma Sámedikki ságadoalli Pirita Näkkäläjärvi lohká leat šállošahtti go Kanada stáhtaministtar Justin Trudeau heaitá stáhtaministtarin.
– Surgat go son heaitá go son lea bargan buori barggu, mii lea leamaš eamiálbmogiidda ávkin, dadjá Suoma Näkkäläjärvi.
Jagis 2019:s deaivvadii son Kanáda stáhtaministtarin go lei Kanádas studeantamátkkis.
Trudeau almmuhii gieskat, ahte son luohpá dan ámmáhis.
– Bođii veahá dakkár morašmiella go gullen dan ođđasa, ahte Kanáda stáhtaministtar geassáda, danne go son lea leamaš okta dain liberála jođiheaddjin máilmmis. Son lea buktán olu doaivaga, ja maiddái veahádagaid ja eamiálbmogiid ustit. Ja eandalii inuihtaide ávkin son lea olu bargan, dadjá Näkkäläjärvi.
Trudeau lea jagi 2015 rájes leamaš Kanáda stáhtaministariin. Vuossárgga son doalai preassakonferánssa, mas muitalii ahte geassáda Liberála bellodaga jođiheaddjin ja stáhtaministtarin.
Trudeau deaivvadii hui álggus iežas stáhtaministtaráigodagas eamiálbmotjođiheaddjiiguin, ja sus ledje čielga lohpádusat sidjiide.
Nu ledje olu álgoálbmogiin stuorra vuordámušat dasa maid Trudeau galggai ollašuhttit stáhtaministtarin, dovddaha árktalaš álgoálbmotpolitihka dutkamušprofessor, Lapland universitehtas, Rauna Kuokkanen.
– Dasto ledje hirbmat stuorra vuordámušat go Trudeau álggii. Son lohpidii dakkár ođđa gaskavuođaid. Nation to Nation son gohčodii – álbmogis álbmogii – diekkár dásseárvosaš gaskavuođaid, lohká Kuokkanen.
Trudeau doarjja lea maŋimuš jagiid áigge sakka njiedjan, go álbmot lea duhtameahttun su politihkain. Maiddái eamiálbmogat lea jorggihan su vuostá.
– Son lohpidii ođđalágán gaskavuođaid, maiddái bidjat soabadeami guovddážii, muhto liikká son lea vuojihan dakkár energiija, industriija ja business ovdduid, eandalii oljobohcciid huksemis Albertas dohko Kanáda oarjeriddui, lohká Kuokkanen.
