Sámediggeáirras Runar Myrnes Balto, dahje Biennáš Elle Elle Eliasa Runar, heaitá politihkkáriin.
Son ii loga iežas leat vejolaš evttohassan Sámediggeválggaide.
Nu almmuhii son otne veaigin iežas Facebook-siiddu bokte.
Myrnes Balto válljejuvvui Sámediggái 2017:s Norgga Sámiid Riikasearvvi (NSR) ovddas.
Son čilge ahte lea dovdan dárbbu juoga eará ge dahkat eallimis, go njunušpolitihkkáriin ii leat dilli nu olu eará doaimmaide.
Son lea muhtun áigge smiehtadan dán ášši birra, ii ge leat fáhkka gal mearridan dán.
– Dát gal lea mearrádus mii lea guhkes áiggi badjel láddan, ja in leat ija badjel gávnnahan dán, lohká Myrnes Balto NRK:i.
Vaikko son dál ii dáhto diekkár njunuš dási sámepolitihkkáriin joatkit, de ii áiggo garvit buot politihkalaš bargguid.
– Mun in joatkke dán dásis sámepolitihkain, muhto mun lean iluin searvan NSR Gáiseguovllu válgabire válgastivrii. Beasan dasto leat mielde evttoheamen ođđa listtu, buori evttohasain, nu ahte áŋgiruššan gal joatká, lohká Myrnes Balto.
Sámediggeráđis lea sus dál ovddasvástádus earret eará bušeahttaáššiin, sámevaši ja rasismma eastadeamis, ja maid dearvvašvuođa ja kulturmuitoáššiin.
